"Манчестер Юнайтед" ўтган ёзда 200 миллион фунтни трансферлар учун сарфлаганди. Аммо Эрик тен Хаг ўзи истаган ҳамма футболчини сотиб олишга муваффақ бўлмаган. Олиб келинганлар – Антони, Каземиро, Лисандео Мартинес ва Тирелл Маласия. Олиб келинмаганларчи? Қуйида "МЮ" ўтган ёзда қўлдан чиқарган футболчиларга эътибор қаратамиз.
Адриен Рабьо
Франция терма жамоаси аъзоси қишки трансферлар ойнасида ҳам "МЮ"га ўтиши мумкин эди. Аммо ундай бўлмади. У ўтган ёзда бир муддат "Ювентус"нинг 23 ёшгача бўлган жамоасида машғулотлар ўтайди. Мавсум давомида Рабьо туринликларнинг асосий фигураси сифатида намоён бўлди. Натижада, ярим ҳимоячи мавсумни жами 48 та ўйин билан тугатди ва 11 та гол урди. Рабьо яқиндагина "Ювентус" билан шартномасини янгилаганди.
Коди Гакпо
"Ливерпуль" ишга киришмасидан олдин, Гакпо тен Хаг томонидан кузатилаётганди. "ПСВ" ва "МЮ" бу борада музокаралар ҳам ўтказган. Бу ҳақида футболчининг ўзи шундай дейди: "Аслида ван Нистелрой билан "МЮ" кўчиш борасида кўп гаплашгандим. Аммо қишда ҳаммаси ўзгарди. У мени катта клубга боришимни истади. Мен эса "Ливерпул"ни танладим".
Юрган Клопп Гакподан мавсумнинг иккинчи қисмида муваффақиятли фойдаланганди.
Френки Де Йонг
Де Йонг ўтган ёзда ҳам, бунисида ҳам омма эътиборида турибди. Ярим ҳимоячига ҳозирда "Манчестер Сити" қизиқиш билдирмоқда. Аммо бир йил олдин бу ўрин "МЮ"га тегишли эди. Тен Хаг минг чиранмасин, футболчи "Барселона"да қолишни афзал кўрди ва бу қарор мавсум охирида ўзини оқлади. У Испания чемпионига айланди. Ҳозир ҳам Де Йонгнинг фикрий позицияси ўзгармаган. Хави буни тасдиқлаганди.
Сержиньо Дест
Дест ҳам "МЮ" эътиборидаги футболчилардан бири эди. "Қизил иблислар" АҚШ терма жамоаси аъзоси эвазига Уан-Биссакани таклиф этади. Аммо футболчининг ўзи Англиядан кўра Италияни афзал кўрди. Дест "Милан"га ижарага берилади. Ҳимоячи у ёқда 2 та лига ўйинида қатнашди холос. Ҳозир Дест омма назаридан бироз четда қолмоқда. У "Барса"дан кетса керак.
Жоау Феликс
"МЮ"нинг португалиялик ҳужумчига қизиққани рост. Ҳатто, айрим манбалар ўтган ёзда Феликс учун 110 миллион фунт таклиф қилинишини билдирганди. "Атлетико" уни сотмагани билан, яхши фойдалана олмади. Мавсумнинг иккинчи ярмида Феликс барибир Англияга келади. Аммо у "Челси" футболчиси сифатида ҳаракат қилди. Мадридликлар эса ўз футболчиси учун беш ойга 11 миллион фунт ижара пули ишлаб олди. "МЮ" ҳозир аллақачон Феликс масаласини унутиб юборган.
ИСМАТОВ Ж.
