“Ульсан Хёндэ” – “Бунёдкор” учрашувидан олдин жамоа бош мураббийлари ва етакчи футболчилари ОАВ ходимлари саволларига жавоб қайтаришди. Анжуманнинг иккинчи қисмида мезбонлар иштирок этишди.

- Эртага майдоннинг ҳар бир қарич жойида кескин курашлар бўлади. Тошкентда ўтган баҳсда ғалаба қозонган бўлсак-да, ҳеч ҳам хотиржам бўлмаймиз ва ўз уйимизда ҳам мухлисларни қувонтиришга ҳаракат қиламиз, - деди “Ульсан Хёндэ” бош мураббийи Ким Хо Гон.

- Эртанги учрашув олдидан шогирдларингизга қандай вазифа қўйдингиз?
- Шогирдларим нима қилишни яхши билишади. Шунингдек, майдонда жамоа сардори шерикларини олдинга бошлаб руҳлантириб туради. Унутмаслик керакки, рақибимиз ҳам анойилардан эмас. Тошкентликлар ҳам бизни мағлуб этишни ўйлашяпти.

- Эртага – иш куни. Шу боисдан ҳам стадионга у қадар кўп мухлис келмайди. Мухлисларга мурожаатингиз...
- Буни тўғри тушунамиз. Бироқ мухлислардан сўрардимки, имконияти бўлганлар футболчиларимизга қўшимча далда бериб турсалар яхши бўларди. Тошкентдаги баҳсда бутун стадион “Бунёдкор”ни қўллаб-қувватлаб турди. Ўйин бошидаёқ гол ўтказиб юбордик ва бироз довдираб қолдик. Лекин қолган дақиқаларда вазиятни ўз томонимизга ўзгартиришга эришдик.

- Эртага нечта гол уришни режалаштиряпсиз?
- Ўтган ўйинимизни таҳлил қилиб чиқдик ва ўз хатоларимиз устида ишладик. Яхши биламизки, ҳужум бу – энг яхши ҳимоя. Биз тўпни кўпроқ ўз назоратимизда ушлашга ва шу орқали финал йўлланмасини қўлга киритишга ҳаракат қиламиз.

- Финалга чиқиш учун рақибнинг имкониятини қандай баҳолайсиз?
- Бу – футбол! Унда кутилмаган ҳолатлар рўй бериши мумкин. Шундай экан “Бунёдкор”нинг имконияти бор. Бироқ биз уни йўққа чиқаришга ҳаракат қиламиз.