Россиянинг "Спорт Экспресс" нашрига маълум бўлишича, Ўзбекистон терма жамоасининг 28 ёшли ҳужумчиси Элдор Шомуродовга Италиянинг “Лечче” ва Испаниянинг “Жирона” клублари қизиқиш билдирган.
Шомуродовнинг "Рома" билан узоқ муддатли шартномаси бор, уни икки йил аввал "Женоа"дан деярли 18 миллион еврога сотиб олганди. Римда Элдор асосий таркиб футболчисига айлана олмади. У ўтган мавсумнинг иккинчи ярмини Б серияга тушиб кетган "Специя" билан ўтказди.
"Ростов" собиқ форвардини ижарага олишнинг янги вариантини қидирмоқда ва Италия ОАВлари "Лечче" ва "Жирона"дан ташқари футболчига даъвогарлар қаторида "Торино" ҳамда Туркия клубларини ҳам тилга олишмоқда.
"Рома" Шомуродовни мажбурий сотиб олиш ҳуқуқи билан ижарага олишга тайёр бўлган жамоага устунлик беришга тайёр, аммо бу шарт ҳозирча молиявий кучли бўлмаган клублардан даъвогарларни тўхтатиб қолмоқда, чунки футболчининг маоши 1,5 миллион еврони ташкил қилади.
Transfermarkt портали Шомуродовнинг нархини 6 миллион еврога баҳоламоқда.
