Миланнинг «Интер» клуби спорт директори Пьеро Аузилио марказий ҳимоячи Алессандро Бастонининг келажаги борасидаги саволга жавоб берди. 27 ёшли футболчининг «Барселона»га ўтиши ҳақидаги хабарлар бир неча ойдан бери тинмаяпти. Миш-мишларга кўра, ўйинчи ҳатто трансферга розилик бериб бўлган.

«Бастонининг трансфери бўйича бизга бирорта ҳам қўнғироқ бўлгани йўқ ва биз, албатта, ҳеч қандай музокараларни ўзимиз бошламаймиз. Бастони «Интер» ва Италия учун жуда катта қийматга эга, у ақл бовар қилмас даражада кучли футболчи. Биз уни жамоада олиб қолмоқчимиз», — дея Аузилионинг сўзларидан иқтибос келтирмоқда Inter Xtra.

Эслатиб ўтамиз, якшанба куни «Интер» А Сериянинг 35-тури доирасида «Парма»ни 2:0 ҳисобида мағлуб этиб, муддатидан аввал чемпионликни қўлга киритди.