Чехиялик ҳужумчи Томаш Чванчара Праганинг “Спарта” клубидан Менхенгладбахнинг “Боруссия” жамоасига кўчиб ўтди. Бу ҳақда немис клуби расмий сайтида маълум қилинган.

22 ёшли футболчи билан 5 йиллик шартнома имзоланган, Чехия клуби бу трансфер учун 10,5 миллион евро ишлаб олади.

"Бу ерда жуда яхши. "Боруссия-Парк" - бу ажойиб стадион. Машғулотларга қўшилишни, шу ерда ўйнашни ва гол уришни интизорлик билан кутяпман", - деди Чванчара клуб матбуот хизматига.

Ўтган мавсумда 30 та ўйинда футболчи 15 та гол урди ва 5 та голли узатмани амалга оширди, "Спарта" эса ўз навбатида мамлакат чемпионлигини қўлга киритди.