Айни пайтда Тошкент шаҳрида олий ва биринчи лига клубларининг тайёрлов гуруҳлари ўртасидаги мусобақанинг финал босқичи бўлиб ўтмоқда.

Артём Сидиров ва Баҳодир Тошмуҳаммедов бошчилигидаги 1998 ва 1999 йилда таваллуд топган футболчилардан иборат бўлган “Бунёдкор” жамоаси мусобақани кўтаринки руҳда ўтказмоқда.

Биринчи турда Бекободнинг “Металлург” жамоаси билан куч синашишган ёш “қалдирғочлар” рақиблари дарвозасига жавобсиз бешта тўп киритишди. Футболчиларимиз 2-турда Жасур Абдураимов бошқарувидаги “Пахтакор” ёшларига рақиблик қилишди. Қизиқарли кечган кичик дербида кучлар тенг келди – 1:1. Гуруҳ босқичидаги сўнгги ўйинда “Бухоро” устидан кичик ҳисобда ғалаба қозонилди – 1:0.

Гуруҳнинг босқичи якунларига кўра “Бунёдкор” ва “Пахтакор”нинг очколари сони бир хил – 7таданни ташкил этди. Мусобақа регламентига кўра “В” квартети ғолиби урилган ва ўтказилган голлар фарқига кўра аниқланди. Унга кўра, ёш “шерлар”дан яхшироқ кўрсаткичга эга бўлган Артём Сидиров ва Баҳодир Тошмуҳаммедов шогирдлари биринчи ўрин билан ярим финалга йўлланма олишди.

Финал остонасида “Бунёдкор”га Фарғонанинг “Нефтчи” жамоаси футболчилари рақиблик қилишади. Ярим финалнинг иккинчи жуфтлигида “Пахтакор” ҳамда Муборакнинг “Машъал” жамоалари куч синашишади. Бу ўйинлар 10 ноябрь куни бўлиб ўтади.

Ёш “қалдирғочлар”га кейинги учрашувларда ҳам омад ва зафарлар тилаб қоламиз.