"Олтин Замин" радиоси номи янграганда кўпчилик футбол мухлислари Фаррух Юнусовни эсга олади. Ўзининг ранг-баранг дастурлари билан ҳалқимиз назарига тушган Ф.Юнусов Россия Федерациясига жўнаб кетган.

- Ассалому алайкум, Фаррух ака! Билишимизча, ҳозирда Санкт-Петербургда экансиз? Қандай ишлар билан хорижга йўл олдингиз?
- Ваалайкум ассалом Улуғбек! Ҳа, мен айни дамда Россиянинг Санкт-Петербург шаҳрида соғлигимни тикламоқдаман.

- Санкт-Петербургда экансиз. Демак, "Зенит" иштирокидаги учрашувларга ҳам тушган бўлсангиз керак а? Tаассуротлар қандай?
- Албатта, ҳаммасини кузатяпман. Сафардагиларидан ташқари. Таассуротлар яхши, лекин мен кутган ва билган "Зенит" майдонда ҳаракат қилмагандек. Сабаби, кучли легионерлар билан мавсум бошида мағлубиятлар сериясини кузатдик. Энди изига тушгандай.

- Ташриф давомида Одил Аҳмедов билан учрашиш ниятингиз йўқми?
- Албатта бор. "Анжи" 9 декабрьда "Зенит" меҳмони бўлади. Ана шу куни кўришиш насиб қилади деб умид қиламан.

- Якунланаётган мавсумда "Навбаҳор" кўрсатаётган ўйинлар ҳақида нима дея оласиз? Жамоа Олий лигада қолиш вазифасини уддалай оладими?
- Менимча, удаллай олади. Сабаби йигитларнинг иродаси кучли. Уларга "маҳоратли ҳакамлар" ҳалақит бермаса бўлди. Олдинда кутилаётган ўйинларда бемалол ғалаба қозонишлари мумкин.

- "Навбаҳор" мураббийи Александр Клименконинг фаолияти ҳақида нима дея оласиз?
- Клименко тажрибали мураббий, жамоа учун жон куйдиради. Наманганда деярли барча машғулотларини кузатардим. Мен очиғини айтаман, жамоанинг паст поғонадан жой олишигиа жамоа ҳам, мураббийлар штабининг ҳам айби йўқ. Нима демоқчи бўлганимни тушунгандирсиз. Яна айтаман йигитларнинг ўйинини бузишга баъзи бир ҳакамлар айбдор.

- Сизни футбол агенти бўлишингиз ҳақида эшитгандик. Шу гаплар ростми?
- Буни вақт кўрсатади. Лекин бу борадаги ниятим жиддий ва футбол агенти бўлиш менинг орзуим.

- Тилакларингиз...
- Мен севимли жамоамга ва клубда тўп сурадиган дўстларимга сўнгги ҳал қилувчи "Шўртан" ва "Қизилқум" билан бўлиб ўтадиган баҳсларда фақат ва фақат омад тилайман. Аллоҳнинг ўзи қўлласин! Одил Аҳмедов билан кўришсам, наманганлик мухлисларнинг каттакон саломини етказиб қўяман!