Ўзбекистон ва Сурия терма жамоалари бош мураббийлари иштирокидаги матбуот анжумани Рас ал-Хайма шаҳридаги "Cove Rotana" меҳмонхонасида бўлиб ўтди.

Муҳаммад Жума (Сурия ёшлар терма жамоаси бош мураббийи):
— Мен Ўзбекистон терма жамоаси бош мураббийининг фикрига қўшиламан. Ҳақиқатан ҳам мусобақада энг муносиб жамоалар қолишди. Ўзбекистон — чемпионликка давогар жамоалардан бири. Рақибимиз БААга ғолибликни қўлга киритиш учун келган. Биз ҳам ўз олдимизга худди шундай вазифа қўйганмиз. Ишончим комил, агар мағлуб бўлсак ҳам, мухлисларимизни чиройли ўйин билан хурсанд эта оламиз.

— Қатар билан ўйиндаги мағлубият сабабини нима билан изоҳлайсиз ва нима учун жамоангиз барқарор эмас?
— Биз дастлабки 2та ўйинда яхши ўйин ўтказдик. 3-турда эса Қатарни менсимадик ва натижада жазоландик. Ҳар бир ўйин — бу катта босим. Кўриб турганингиздек, бизнинг ўйинларимизга кўплаб суриялик мухлислар ташриф буюришмоқда. Улар бизни қўллаб-қувватлаб туришибди. Шу билан биргаликда футболчиларда ўзларида қўшимча босимни ҳис қилишмоқда. Бу эса ўйинимизга таъсир кўрсатмоқда.