Бугун ёшлар ўртасидаги Осиё чемпионатида 4та чорак финал баҳслари ўтказилади. Ушбу ўйин  барча жамоалар учун катта аҳамиятга эга ва бу ўйинларнинг ғолиблари келаси йили бўладиган жаҳон чемпионатида иштирок этишади. Демак, 4та жамоа учун ушбу ёш тоифасида терма жамоа ўз фаолиятини тугатса, 4та жамоа йирик мусобақада иштирок этиш орқали янада ўсишда давом этади.

Ёдингизда бўлса, ўсмирлар ўртасидаги Осиё чемпионатининг плей-офф ўйинларида қўшимча таймлар йўқ эди. Ўйин дуранг билан тугаса, жамоалар дарҳол пенальтилар серияси орқали ғолибни аниқлашганди. 19 ёшли футболчилар мусобақасида эса бундай эмас. Регламентнинг "Техник қоидалар" деб номланган II боби, 6-моддасида бу нарса аниқ қилиб ёзиб қўйилган.

6. Қўшимча таймлар
- Агар плей-офф босқичида ўйиннинг асосий вақтида дуранг натижа қайд этилса, жамоалар ҳар бири 15 дақиқадан иборат 2та тайм ўтказишади. Асосий вақт ва қўшимча бўлимлар орасидаги танаффус 5 дақиқани ташкил қилади. Иккита қўшимча таймлар орасида танаффус берилмайди.

Шунда ҳам ғолиб номи аниқланмаса, унда пенальтилар сериясига мурожаат қилинади.