"Манчестер Юнайтед" ярим ҳимоячиси Скотт Мактоминай фаолиятини Италияда давом эттириши мумкин. Бу ҳақда журналист Саша Тавольери хабар берди.
Манбага кўра, 26 ёшли шотландиялик футболчининг хизматларига "Рома" қизиқиш билдирмоқда. Рим клуби агар сербиялик ярим ҳимоячи Неманя Матич жамоани тарк этса, Мактоминай борасида таклиф билан чиқишга тайёр.
Мактоминай ўтган мавсумда "Манчестер Юнайтед" сафида 39 та ўйинда майдонга тушиб, 3 та гол урди ва битта голли узатмани амалга оширди. Transfermarkt портали шотландиялик футболчини 25 миллион еврога баҳоламоқда.
Эслатиб ўтамиз, Англия чемпионатининг янги мавсуми келаси ҳафта бошланади. "Манчестер Юнайтед" биринчи ўйинини 14 август куни "Вулверхэмптон"га қарши ўтказади.
