Ўзбекистон терма жамоасининг ЖЧ-2014 йўлида Эронга қарши ўтказадиган муҳим ўйини олдидан ярим ҳимоячи Жасур Ҳасанов ўз фикрларини билдириб ўтди. Хабарингиз бор, ушбу учрашувда Жасур Ҳасанов дисквалификация туфайли иштирок эта олмайди. Тажрибали футболчи Эронга қарши кечадиган ўйинда чап қанот ярим ҳимоясида ўйнаши мумкин бўлган футболчилар борасида ҳам айтиб ўтди.

— Сафарда бўладиган ўйинда Эрон терма жамоасидан ҳужумкор ўйин кутяпман. Эронликларнинг бошқа иложи ҳам йўқ. "Озодий" стадиони жуда катта ва бугун 100 минг мухлис келиши айтиляпти. Бунча мухлис қаршисида эса ёмон ўйнашнинг иложи йўқ.

— Миржалол Қосимов бундай ўйинга қарши қандай тактика танлаши мумкин?
— Бунисини очиқ айта олмайман. Миржалол ака билан клубда ҳам, терма жамоада ҳам бирга ишлаймиз. Эронга қарши тўғри тактика танлай олишига ишонаман. Кеча интервьюларини ўқигандим, унда Эронга қарши ўйинда ҳимояга ётиб олмаймиз, деган экан. Демак, бизнинг жамоамиз ҳам ўз кучига ишонган ҳолда, ўз ўйинини намойиш қилади.

— Сиз терма жамоанинг асосий таркиб футболчиси ҳисобланасиз. Бугун чап қанотда, сизнинг ўрнингизда ким ўйнаши мумкин?
— Менимча Станислав Андреев билан Шоҳруҳ Гадоевлардан бири ўйнаса керак. Марат Бикмаев ҳам чап қанотда ўйнай олиши мумкин. Ким бўлишидан қатъий назар, бугун ўша футболчига ҳам, бутун терма жамоамизга ҳам омад тилайман.

Давоми "Даракчи"да.