Ўйиндан кейинги матбуот анжуманида Эрон миллий терма жамоаси бош мураббийи Карлос Кейруш иштирок этмади. Унинг ўрнига ёрдамчиси Рене Симоэш журналистларнинг саволларига жавоб берди. Матбуот анжумани залидан ЎФФ расмий Твиттери хабар бериб  турди.

"Футбол — бераҳм. У бугун сенга кулиб боқса, эртага сендан юз ўгиради", — дея кириш сўзи билан бошлади португалиялик мутахассис. "Бугун жамоамизга ҳужумларни якунлаш етишмади. Тўп оширишлар, комбинация уюштиришлар бор, аммо гол бўлмади. Гуруҳда мураккаб вазият юзага келди. Ўзбекистон 1-ўринга чиқиб олди. Энди очко йўқотишга ҳаққимиз йўқ".

"Футболда адолат бор дейсизми? Бу борада ҳакамлар айбдор эмас. ФИФАнинг ҳакамлик билан иши йўқ. Уларга барибир. ФИФА голларни аниқлаш борасида муҳим қарор қабул қилиши керак. Боиси ҳакамларнинг хатоси туфайли кўп жамоалар азият чекяпти", дея ўйиндаги ҳакамлик бўйича ўз норозилигини билдирди Рене Симоэш.

"Ғалаба қозонсанг, осмонларга олиб чиқишади, ютқазсанг эса ерга кўмишади. Шу боис футбол бешафқатдир. Мен футболда кўпроқ журналистларни ҳурмат қиламан. Чунки, улар мағлубиятга учрамайдилар. Боиси, улар ўйиндан кейин гапиришади. Агар футболда адолат бўлганида, бугун ҳисоб 0:0 бўларди. Журналистлар эса буни билишниям, тушунишниям исташмайди", дея ҳасрат қилди бош мураббий ёрдамчиси.

"Энди гуруҳда аҳволимиз оғирлашди. Тақдиримиз рақибларга боғлиқ бўлиб қолди. Аммо имконият бор, ҳали тўла йўқолмаган. Баҳорда бўладиган ўйинларгача вақт бор ва биз унгача ўйинларга тайёргарлик кўрамиз. ЖЧ-2014 учун тўғридан-тўғри бўлмаса ҳам, плей-офф орқали йўлланмани қўлга киритиш мумкинлигини унутмайлик. Лекин биз плей-оффни кутмасдан, дастлабки 2та ўринни эгаллашга ҳаракат қиламиз", дея ўз фикрларини якунлади Рене Симоэш.