«Ювентус» мухлислари клуб ҳужумчи Ромелу Лукакуни сотиб олиш режасига қарши ўз норозиликларини билдиришди. Бу ҳақда "La Gazzetta dello Sport" хабар тарқатди.
Бир неча нафар ишқибоз сешанба куни "Ювентус" уй стадиони яқинида йиғилиб, баннер орқали ўз эътирозларини билдиришди. Улар кўтариб олган баннерда "Лукаку, Миланда қол, бизда аллақачон захирада дарвозабони бор", дея ёзилганди.
Бу орқали улар "Манчестер Сити"га қарши бўлиб ўтган Чемпионлар лигаси финалида Ромелу дуч келган вазиятни назарда тутишди. Яъни, "Интер" футболчиси Ди Марко бош билан зарба берган пайтда тўп Лукакуга тегиши оқибатида "Сити" голдан қутулиб қолганди.
Маълумот ўрнида, "Ювентус" Ромелу Лукакуни ўз форварди Душан Влаховичга алмаштириш вариантини ҳам кўриб чиқмоқда.
Эслатиб ўтамиз, аввалроқ "Интер" фанатлари ҳам бельгиялик футболчининг жамоада қолишига нисбатан норозилик билдиришганди. Чунки Ромелу "Юве" билан яширинча келишув олиб борган.
