Бунга кўникиш ва қабул қилиш бироз қийин бўлади. Жараён маълум вақт талаб этади. Бироқ 10 йилдан ортиқ футбол оламизни ларзага келтирган икки ном, Месси ва Роналду, ортиқ дунёнинг энг яхши футболчилар эмас. Бу иккиси "Реал" ва "Барселона"да барча рекордларни янгилаб чиқди ва футболдаги энг катта қарама-қаршиликни юзага келтирди. Улар айнан Испанияда ўзининг энг юқори даражасига чиққанди.
Ҳозир 2023/24 йилги мавсум бошланиш арафасида турибди. Бу пайтда Лионель Месси MLS'да фаолият бошлади. Роналду эса Саудия Про-лигасида илк тўлиқ мавсумига тайёргарлик кўрмоқда. Шундай экан, ушбу даҳолар ортиқ Европага қайтмайди ва ўзларининг аввалги даражаларига чиқа олмайди.
Узоқ вақт давомида юқори ритмда ҳаракат қилиб келган ҳужумчилар қайсидир давр мобайнида ўзларининг пикида бўлган. Бугун айнан ўша, энг яхши индивидуал йилни эслаб ўтамиз. Бу давр Лионель Месси учун 2011/12 йилги мавсум бўлса, Криштиану Роналдуга эса 2014/15 йилда тенгсиз бўлиш насиб этади. Улар ўн йилдан ортиқ вақт давомида ақлбовар қилмас барқарорлик намойиш этганди. Голлар ва ассистлар борасида энг яхши кўрсаткичга эса юқоридаги йилларда эришилган.
Месси 2011/12 йилларда фантастик даража намойиш этган. Афсуски, мавсум "Реал"га бой берилиб, "Барселона" Испанияда чемпион бўла олмайди. Қолаверса, Месси ЕЧЛ ярим финалида муҳим пенальтидан фойдалана олмай, "Челси"га мағлубиятга сабабчи бўлади. Шунга қарамай, мавсум аргентиналик учун совринсиз тугамайди. Каталонияликлар Испания кубогига эга чиқади. Орадан икки йил ўтиб, Роналду шахсий рекордларини янгилайди. Ҳар қайси кўрсаткичда тенгсиз бўлган ҳужумчи, жамоаси билан соврин юта олмайди. Негаки, 2015 йилда барча совринларни Месси бошчилик қилаётган "Барселона" олиб қўяди.
Қуйида икки афсонанинг энг яхши йиллари солиштирилади.
Лионель Месси (2011/12)
Ўйинлар: 60 та
Стартлар: 56 та
Захирадан: 4 та
Голлар: 73 та
Ассистлар: 29 та
Пенальтидан урилган голлар: 14 та
Хет-триклар: 10 та
Жарима зарбасидан голлар: 3 та
Ўртача: ҳар 71.5 дақиқада 1 та гол
Ўртача голда қатнашиш: ҳар 51.2 дақиқада
Совринлар: Испания Суперкубоги, УЕФА Суперкубоги, Клублар ўртасидаги мундиал ғолиби, Испания кубоги.
Криштиану Роналду (2014/15)
Ўйинлар: 54 та
Стартлар: 52 та
Захирадан 2 та
Голлар: 61 та
Ассистлар: 21 та
Пенальтидан: 13 та гол
Хет-триклар: 8 та
Жарима зарбасидан голлар: 2 та
Ўртача: ҳар 76.1 дақиқада 1 та гол
Ўртача голда қатнашиш: ҳар 56.6 дақиқада
Совринлар: УЕФА Суперкубоги, Клублар ўртасидаги мундиал ғолиблиги.
ИСМАТОВ Ж.
