Тошкентда бўлиб ўтган олий ва биринчи лига жамоаларининг захира тайёлов гуруҳлари ўртасидаги мусобақа ҳам якунига етди. Бунда иштирок этган «Машъал» футбол мактабининг 1998 йилда туғилган тарбияланувчлари финал баҳсида «Бунёдкор»ни мағлубиятга учратиб биринчи ўринни қўлга киритишди. Бутун турнир мобайнида муборакликларни «Машъал»да фаолият олиб бораётган Владимир Павленко, Жонибек Эгамбердиев, Абдурашид Жўраев, Николай Лапа, шунингдек узоқ-яқиндан келган ота-оналар қўллаб туришди. Бу эса ўз самарасини бермай қолмади. Биз эса фурсатдан фойдаланиб «Машъал-98» бош мураббийи Анвар Ҳафизовдан интервью олдик. 

- Аввало бу йилги мусобақадан олган таассуротларингиз ҳақида тўхталиб ўтсангиз.
- Бу йилги ўйинлар ҳам ўзига яраша қийин кечди. Жамоаларнинг савияси бир-бирига тенглашиб қолгани кўринди. Гуруҳ учрашувлари ҳам осон кечмади. Ҳар бир жамоа ютиш учун кураш олиб борди. Баҳслар бошланишидан бир кун олдин Муборакдан Тошкентга кеч етиб келганимиз боис «Нефтчи» билан ўтган биринчи ўйинда шогирдларим бор кучларини кўрсата олишмади. Чунки йўл чарчоғидан тикланиб олишга тўлиқ вақт етмади. Шунга қарамай, биринчи ўйинни 2:0 ҳисобида ўз фойдамизга ҳал этдик ва бу нарса кейинги ўйинларда ҳам ўз таъсирини кўрсатди. Шуни айтишим мумкин, ўйиндан ўйинга жамоамиз кучайиб борди. «Пахтакор» тарбияланувчиларига қарши кечган ярим финал учрашувида 1:0 ҳисобида олдинда бораётгандик, кейин дарвозабонимиз четлатилганидан сўнг майдонда 10 киши бўлиб қолдик ва оқибатда гол ўтказиб юбордик. Аммо пенальтилар сериясида омад биз томонда бўлди. Финал ўйинини эса «Бунёдкор» футболчиларига қарши ўтказдик ва бу учрашувда рақибдан 2:1 ҳисобида устун келдик.

- Маълумки, «Машъал-98» ўтган йил ҳам Тошкентга келган, аммо гуруҳдан чиқа олмаганди.
- Ўшанда биз бир ёш катта жамоаларга қарши тўп сурганимиз ҳамда шогирдларимда савия бироз камлиги учун гуруҳдан чиқа олмагандик. Агар «Навбаҳор»га 3:4 ҳисобида имкониятни бой бермаганимизда гуруҳдан чиққан бўлардик. Ўтган йил тайёрлов гуруҳлари мусобақасида қатнашиб тажриба тўплаган бўлсак, бу йил шу тажриба қўл келиб ғолибликни қўлга киритдик.

- Ўтган бир йил ичида жамоангиз қанчалик ўзгарди?
- Ўйлайманки, футболчилар тактик ва техник томонлама бирмунча пишиб етилишди. Бир сўз билан айтганда, анча оёққа туриб олдик.

- Шогирдларингиздан нечта футболчи терма жамоага даъвогар ҳисобланади?
- Биласиз, 1998 йилда туғилган футболчилардан иборат терма жамоамизни Темур Олимхўжаев бошқаряпти. «Машъал-98»дан бугунги кунда 8 нафар тарбияланувчи терма жамоа йиғинларида иштирок этяпти. Шулардан бештаси мунтазам ўйинларда майдонга тушмоқда.

- Бу йилги тайёрлов гуруҳлари мусобақасида энг қийин ўйин қайси бўлди?
- «Нефтчи» билан кечган баҳсни айтишим мумкин. Чунки узоқ йўл босиб пойтахтга келганимиз ҳамда эртаси куниёқ майдонга тушганимиз ўз таъсирини кўрсатмасдан қўймади. Қолган баҳслар эса унчалик қийин кечмади.

- Жамоангиз «Насаф» билан «Пахтакор»ни ўйиннинг асосий вақтида енгга олмади. Бунинг сабаби нимада?
- Хавфли вазиятлардан унумли фойдалана олмаганимиз учун асосий вақтда ғалаба қозонмадик деб ўйлайман.

- Айнан «Нефтчи»га қарши баҳсдаги ғалаба мусобақада муҳим роль ўйнади деб ҳисоблайсизми?
- Албатта. Бундай қисқа вақт оралиғида ўтадиган турнирларда биринчи ўйинни ғалаба билан бошлаш жуда муҳим аҳамият касб этади. Ғалаба қозонсангиз, йигитларнинг ўзларига бўлган ишончи ортиб боради.

- Гуруҳ ўйинлари кетма-кет ҳар куни ўтказилди. Бу ёшдаги футболчилар ҳар куни майдонга тушиб чарчаб қолишмайдими?
- Чарчоқ бўлади, лекин бошқалар ҳам ҳар куни ўйин ўтказишини инобатга олсак, ким жисмоний жиҳатдан кучли бўлса ўша жамоа турнир охиригача ўзини кўрсата олади.

- Бир неча йилдан бери болалар футболида фаолият олиб боряпсиз. Болалар билан ишлашнинг ўзига хос томонлари нимада?
- Бола ўз номи билан бола. Кичик ёшдаги футболчиларга тўп тепишни ўргатаётганда мураббий уларга қаттиқ гапириши ёки сўкиши керак эмас. Балки уларга тўғри муомалада бўлиши, хатоларини ёнига чақириб секин тушунтириб бериши лозим. Негаки ҳадеб уришавергандан кейин бола футболдан безиб қолади, бу эса аввало мураббийнинг ўзига қийинчилик олиб келади.

- Мана, мусобақа ҳам якунига етди. Энди кейинги режалар қандай?
- Шу билан биз учун жорий мавсум тугади деса бўлади. Чунки бундан буёғига бошқа турнир қолмади. Энди кейинги йил учун тайёргарлик кўрамиз.

- Айтинг-чи, болалар футболида натижа қанчалик муҳим?
- Кичик ёшдаги футболчилардан бирданига натижа талаб қилиш тўғри эмас, бунда мураббий учун энг муҳими шогирдларига тўғри футбол ўйнашни ўргатиш ҳисобланади. Бола профессионал футболга қадам қўйганидан кейин натижа учун ўйнаш кераклигини ўзи тушуниб етади.

Хайрулла ХОЛИҚОВ суҳбатлашди.