Лондоннинг "Челси" клуби ҳужумчиси Ромелу Лукакунинг атрофидаги вазият тафсилотлари маълум бўлди. Бу ҳақда La Gazzetta dello Sport нашри хабар бермоқда.
Манбага кўра, бельгиялик футболчининг ўзи "Челси"да ўйнашни истамаяпти, Лондон клуби эса Лукакуни ўз таркибида кўришни истамаяпти. "Кўклар" бош мураббийи Маурисио Почеттино ҳужумчининг бошқа футболчиларга салбий таъсиридан қўрқиб, унга бошқа футболчилар билан машғулотлар ўтказишни тақиқлади.
"Челси"нинг муаммоси шундаки, Лукакуга кўп жамоалар қизиқмайди. "Тоттенхэм" ва "Ювентус" клубларининг қизиқиши бор, аммо Италия клубининг бельгиялик футболчини Душан Влахович учун қўшимча тўлов билан алмашиш ҳақидаги таклифи лондонликлар раҳбарияти томонидан рад этилди.
Лукакунинг "Челси" билан шартномаси 2026 йилнинг июнигача амал қилади.
