«Манчестер Сити» ҳимоячиси Жоау Канселу фаолиятини «Барселона»да давом эттириши мумкин, дея хабар беради журналист Николо Скира.
Манбага кўра, каталонияликлар 29 ёшли португалияликни сотиб олиш ҳуқуқи билан ижарага олмоқчи.
Канселу 2022/23 йилги мавсумнинг иккинчи ярмини ижара асосида «Бавария»да ўтказди. Ҳимоячи мюнхенликлар сафида 21 та ўйин ўтказиб, 1 та гол урди ва 6 та голли узатмани амалга оширди.
Шартнома якунида «Бавария» сотиб олиш опциясини фаоллаштирмасликка қарор қилди. Transfermarkt порталига кўра футболчининг нархи 50 миллион еврога баҳоланмоқда. Канселунинг «Ман Сити» билан шартномаси 2027 йилнинг ёзида якунига етади.
