Бугун мамлакатимиз Олий лига 25-тури доирасида Қаршининг «Насаф» жамоаси ўз майдонида Тошкентнинг «Локомотив» жамоасига мағлубиятга учрагандан сўнг, «Насаф» ПФК раҳбарияти Усмон Тошевни истеъфога чиқариш эҳтимоли кўпайди. Бу ҳақда «Voha.Uz» интернет-нашри хабар тарқатмоқда.

Бугунги мағлубият мухлисларнинг кескин норозилигига сабаб бўлди ва улар стадионда Усмон Тошевни очиқчасига истеъфосини талаб қилишди, деб ёзади манба.

Ўтган йилги ОФК кубогини соҳиби бўлган ва чемпионатнинг кумуш медалини қўлга киритган «Насаф» жамоаси, Усмон Тошевнинг мураббийлиги даврида умуман ўйинини йўқотиб қўйди, жамоада кутилмаган мағлубиятлар кўпайиб кетди. Жамоада руҳий ҳолат ва кайфият жуда тушиб кетди, натижада «Насаф»нинг ўйинларида мазмун йўқолди. Бу албатта, мухлисларни норозилигига сабаб бўла бошлади. Оқибатда уларнинг стадионга ташрифи ҳам кескин камайиб кетди. Бугунги мағлубият «Насаф» клуби раҳбарларининг ҳам сабр косасини тўлдирган бўлса ғеч ажабланмаймиз. Энди шундай жамоа бу йилги чемпионатда ҳаттоки бронза соврининидан маҳрум бўлиши деярли ҳал бўлиб қолди.

Энди қолган охирги турда ва Ўзбекистон Кубоги мусобақаларида бизнинг тахминимизча, «Насаф» нинг ёш ва келажагидан умид қилса бўладиган, ҳозирги пайтда «Насаф» ўринбосарларига устозлик қилаётган мураббий Рўзиқул Бердиев «аждарлар»ни майдонга бошлаб тушса ажаб эмас.