"Зенит" "Бенфика" вингери Давид Нереснинг трансферини расмийлаштиришга уринишларини давом эттирмоқда. Diario de Transferencias'нинг CNN Portugal нашрига таяниб хабар беришича, петербургликлар Португалия клубига 45 миллион евро миқдорида янги таклиф тайёрламоқда.
Аввалроқ, "Зенит" 26 ёшли бразилиялик учун 35 миллион таклиф қилган, бироқ рад жавоби берилганди. A Bola нашри Нереснинг ўзи Россия клубига ўтмоқчи эмаслигини таъкидлади.
Ўтган мавсумда вингер барча турнирларда 48 та ўйинда майдонга тушиб, 12 та гол урди ва 16 та голли узатмани амалга оширди. Transfermarkt портали футболчининг нархини 25 миллион еврога баҳоламоқда.
