"Барселона" матбуот хизмати тарихдаги энг кўп соврин ютган футболчига айланган аргентиналик ҳужумчи Лионель Мессининг муваффақиятига муносабат билдирди.
“Лео Мессини барча даврларнинг энг совриндор футболчисига айлангани билан табриклаймиз. 44 та кубок. Биз бу ақл бовар қилмайдиган тарихнинг бир қисми эканлигимиздан фахрланамиз”, - дейилади “Барселона” матбуот хизмати баёнотида.
Эслатиб ўтамиз, 20 август куни MLS + MX Лига кубогининг финал ўйини ниҳоясига етди ва унда "Нэшвилл" ва "Интер Майами" тўқнаш келди. Учрашувнинг асосий вақти дуранг билан якунланди - 1:1. Пенальтилар сериясида эса “Интер Майами” футболчилари кучлироқ чиқди. Аргентиналик футболчи профессионал фаолиятидаги 44-совринни қўлга киритди ва тарихдаги энг титулли футболчига айланди.
