"Бавария" Руанда давлати билан ҳамкорлик шартномасини имзолади.
Шартнома 5 йилга мўлжалланган - 2028 йилгача. Ҳамкорлик “Бавария”нинг Руанда республикаси спорт вазирлиги билан мамлакатда футболни ривожлантириш учун футбол академиясини ташкил этиш бўйича ҳамкорлигини кўзда тутади.
Бундан ташқари, "Бавария" Руандада туризм ва сармоявий имкониятларни тарғиб қилиш бўйича турли тадбирларда иштирок этади. Visit Rwanda логотипи ўйин кунлари "Альянц Арена"нинг таблоларида ҳам акс этади.
"Мен бу ҳамкорликдан жуда мамнунман. "Бавария" Африка қитъасида фаол бўлиб, муҳим тажриба орттириши мумкин бўлади. Янги платинали ҳамкорлик узоқ муддатли мақсадларимизга мос келади – биз Руандада туризмни тарғиб қиламиз ва болалар футболи соҳасидаги лойиҳалар билан мамлакатда спортни ривожлантиришга ёрдам берамиз. Бу мураккаб ва масъулиятли вазифалар.
Африка - имкониятлар қитъаси. “Бавария” учун бу халқаро миқёсдаги навбатдаги муҳим қадамдир” - деди “Бавария” бош директори Ян-Кристиан Дрезен.
