Ўзбекистон Суперлигасининг 18-туридан ўрин олган “Навбаҳор” – ОКМК жамоалари ўртасидаги учрашув арафасида “лочинлар”нинг сербиялик 31 ёшли тажрибали ҳимоячиси Филип Иванович бўлажак ўйин ҳақидаги фикрлари билан ўртоқлашди.

- Бўлажак баҳс кескин курашлар остида ўтади, деган умиддаман. Боиси, ҳар икки жамоа Қатарда бўлиб ўтган Осиё Чемпионлар Лигаси (ОЧЛ) “плей-офф” баҳсларини бир кунда ўтказиб, ўша ўйинларда зафар қучиб, мазкур нуфузли мусобақанинг гуруҳ баҳсларига биргаликда йўл олди.

Шунингдек, мазкур клублар жорий мавсумда ўз олдига юксак мақсадлар қўйган. Хабарингиз бор ,ўтган турда Жиззахда аламли тарзда мағлубиятга учрадик. Олмалиқликлар ҳам ўз майдонларида “Нефтчи” билан дуранг ўйнаб, очко йўқотишди. Шу боис, бўлажак беллашувнинг аҳамияти ҳар икки жамоа учун катта.

Таъкидлаганимдек, ўтган турда мухлисларни ранжитиб қўйгандик. ОКМКга қарши кечадиган баҳсда майдонга ғалаба иштиёқида тушиб, зафар қучиб, ишқибозларга қувонч улашамиз, деган умиддаман.

Бўлажак ўйиндаги ғалаба жамоамизнинг совринли ўринлар учун кураш йўлидаги имкониятини оширади. Умуман олганда, бўлажак баҳснинг кескин курашлар остида, шиддатли, томошабоп ва қизиқарли тарзда кечиши эҳтимоли юқори.

Мухлисларимизнинг стадиондан уйларига яхши кайфиятда қайтишларини таъминлаш учун барча имкониятимизни ишга соламиз. “Навбаҳор” жорий мавсумда ўзи қатнашадиган барча мусобақаларда зафар қучишни мақсад қилган.

Буни амалга ошириш учун эса биз – футболчилар қўлдан келганича ҳаракат қиламиз." - деди Иванович.