Бирлашган Араб Амирликларининг Абу-Даби шаҳрида шахмат бўйича ўтган халқаро турнирда юртимиз шарафини ҳимоя қилган гроссмейстер Сергей Қаюмов кумуш медалга сазовор бўлди, деб хабар бермоқда ЎзА.

Дунёнинг ўндан зиёд мамлакатидан 51 нафар шахматчи иштирок этган нуфузли мусобақада ўзбек шахматчиси ҳиндистонлик Жозеф Ансон, суриялик Мажид Хелавий, Жой Томех, филиппинлик Рокки Пабалан, Лойола Робинсон, мезбон шахматчилардан Зайд Али ал-Ҳамид ва Абдулла Файсални мот қилди, мисрлик Фуад Ат-Тоҳир билан дуранг ўйнаб, жами 7,5 очко жамғарди.

Ҳиндистоннинг Ченнай шаҳрида ҳал қилувчи паллага кирган нуфузли шахмат турнирида эса яна бир тажрибали гроссмейстеримиз Марат Жумаев совринли ўринлар учун курашни давом эттирмоқда.

Йигирмага яқин мамлакатдан 450 нафардан зиёд шахматчи дона сураётган мусобақада мағлубиятсиз ўйнаётган ҳамюртимиз тўрт ғалаба ва икки дуранг қайд этиб, беш очко жамғарди. Марат Жумаев еттинчи тур олдидан мусобақа пешқадами ҳиндистонлик гроссмейстер Лалит Бабудан атиги ярим очкога ортда.