Ўзбекистон Тасвирий санъат галереясида шахмат бўйича дунёнинг 12 нафар етакчи гроссмейстерлари ўртасида ўтказилаётган ФИДЕ Гран-Присида бугун бешинчи тур ўйинлари бўлиб ўтди.
Ушбу турда ҳамюртимиз Рустам Қосимжонов хитойлик Ванг Хаога қарши қора доналарда баҳс юритиб, 40-юришда рақибини мағлубиятга учратди. Мазкур ғалабадан сўнг Рустам Қосимжонов ҳисобидаги очколар сони 3 тага етди ва эндиликда ҳамюртимиз пешқадамлар сафида бормоқда.
Бугун бўлиб ўтган 5-турда, шунингдек, Гата Камский (АҚШ) Борис Гельфанд (Исроил) устидан ғалаба қозонган бўлса, украиналик Руслан Пономарев россиялик Александр Морозевични мағлуб этди.
Шаҳриёр Мамедяров (Озарбойжон) - Фабиано Каруана (Италия), Леньер Домингес Перес (Куба) - Пётр Свидлер (Россия) ҳамда Сергей Карякин (Россия) - Петер Леко (Венгрия) ўртасида кечган партияларда дуранг натижалар қайд этилди.
Бешинчи тур якунларига кўра бир йўла тўрт нафар гроссмейстерлар Александр Морозевич, Фабиано Каруана Шаҳриёр Мамедяров ва Рустам Қосимжонов ҳисобида 3 тадан очко мавжуд. Руслан Пономарёв, Пётр Свидлер, Ванг Хао, Петер Леко 2,5 тадан очко жамғаришган. Леньер Домингес Перес ҳисобида 2 очко бўлса, Гата Камский ва Борис Гельфанд 1.5 тадан очко тўплашди.
Қуйида 28-ноябр куни ўтказиладиган 6-тур жуфтликлари билан танишинг.
Гата Камский - Рустам Қосимжонов
Петер Леко - Ванг Хао
Пётр Свидлер - Сергей Карякин
Александр Морозевич - Ленъер Домингес Перес
Фабиано Каруано - Руслан Пономарев
Борис Гелъфанд - Шаҳриёр Мамедяров
Учрашувлар соат 14:00да бошланади.
Шавкат Жалилов
Маданият ва спорт ишлари вазирлиги матбуот хизмати
