"Манчестер Сити" ҳужумчиси Эрлинг Холанд АПЛ 2023/24 йилги мавсумининг 4-турида "Фулхэм" билан кечга учрашувда ўз ҳисобига 3 та гол ёздириб қўйди. Норвегиялик 23 ёшли тўпурар АПЛга кўчиб ўтганига эндигина 1 йил йил бўлганига қарамай хет-триклар сонини 5 тага етказиб олди. АПЛда энг кўп хет-трик қайд этган футболчилар билан танишамиз.

9-15 ўринлар

Англия юқори дивизионида Холанддан ташқари яна бир нечта футболчилар ҳисобида 5 тадан хет-трик бор. Улар Рахим Стерлинг, Руд ван Нистелрой, Энди Коул, Иан Райт, Робин ван Перси ва Дмитар Бербатов. Кўриниб турибдики, бу рўйхатдан фақатгина Стерлинг ва Холандгина ўз натижасини ошириши мумкин.

8-ўрин

Ҳозирда фаолиятини Бразилияда давом эттираётган Луис Суарес Англияда "Ливерпуль" сафида тўп тепиб юрган вақтларда анчагина гол уриб қўйганди. У нақ 6 бор АПЛда хет-трик қайд этишга улгурган.

7-ўрин

Рўйхатимизнинг 7-поғонасида англиялик машхур тўпурар Уэйн Руни. У "Манчестер Юнайтед" ва "Эвертон" клубларидаги Англиядаги фаолияти давомида 7 бор АПЛда хет-трик қайд этган.

4-6 ўринлар

Бу ўринларда бирданига 3 та футболчи жойлашган. Харри Кейн, Майкл Оуэн ва Тьерри Анри Премьер-лигада 8 марта бир ўйинда рақиблар дарвозасига 3 мартадан йўл топган. Кейн бу натижасини яхшилаши мумкин эди, аммо у ёзда "Тоттенхэм"ни "Бавария"га алмашди.

3-ўрин

Рейтингимизнинг кучли учлигини Робби Фаулер очиб беради. "Ливерпуль" ва "Манчестер Сити"даги фаолияти билан мухлисларга яхши таниш бўлган ҳужумчи Робби нақ 9 бор АПЛда хет-трик муаллифи бўлган.

2-ўрин

Алан Ширер 11 та хет-трик билан бу рўйхатда 2-ўринни эгаллади. Англиялик машҳур тўпурар "Ньюкасл", "Блэкберн" ва "Саутгемптон" муҳлисларини ўз голлари билан хурсанд қилган.

1-ўрин

Рейтингимизнинг пешқадами - Серхио Агуэро. Аргентиналик тўпурар ҳужумчи ўтган 2021 йилда юрагидаги муаммолар сабаб фаолиятини якунлаганди. У "Атлетико"дан "Манчестер Сити" сафига ўтганидан сўнг АПЛда 12 бор хет-трик қайд этган, лигадаги умумий голлари сони эса 184 тани ташкил қилади. Кўрамиз, яқин орада унга яқинлаша оладиган футболчи чиқа олармикин.