"Manchester Siti" hujumchisi Erling Xoland APL 2023/24 yilgi mavsumining 4-turida "Fulxem" bilan kechga uchrashuvda o‘z hisobiga 3 ta gol yozdirib qo‘ydi. Norvegiyalik 23 yoshli to‘purar APLga ko‘chib o‘tganiga endigina 1 yil yil bo‘lganiga qaramay xet-triklar sonini 5 taga yetkazib oldi. APLda eng ko‘p xet-trik qayd etgan futbolchilar bilan tanishamiz.

9-15 o‘rinlar

Angliya yuqori divizionida Xolanddan tashqari yana bir nechta futbolchilar hisobida 5 tadan xet-trik bor. Ular Raxim Sterling, Rud van Nistelroy, Endi Koul, Ian Rayt, Robin van Persi va Dmitar Berbatov. Ko‘rinib turibdiki, bu ro‘yxatdan faqatgina Sterling va Xolandgina o‘z natijasini oshirishi mumkin.

8-o‘rin

Hozirda faoliyatini Braziliyada davom ettirayotgan Luis Suares Angliyada "Liverpul" safida to‘p tepib yurgan vaqtlarda anchagina gol urib qo‘ygandi. U naq 6 bor APLda xet-trik qayd etishga ulgurgan.

7-o‘rin

Ro‘yxatimizning 7-pog‘onasida angliyalik mashxur to‘purar Ueyn Runi. U "Manchester Yunayted" va "Everton" klublaridagi Angliyadagi faoliyati davomida 7 bor APLda xet-trik qayd etgan.

4-6 o‘rinlar

Bu o‘rinlarda birdaniga 3 ta futbolchi joylashgan. Xarri Keyn, Maykl Ouen va Tyerri Anri Premyer-ligada 8 marta bir o‘yinda raqiblar darvozasiga 3 martadan yo‘l topgan. Keyn bu natijasini yaxshilashi mumkin edi, ammo u yozda "Tottenxem"ni "Bavariya"ga almashdi.

3-o‘rin

Reytingimizning kuchli uchligini Robbi Fauler ochib beradi. "Liverpul" va "Manchester Siti"dagi faoliyati bilan muxlislarga yaxshi tanish bo‘lgan hujumchi Robbi naq 9 bor APLda xet-trik muallifi bo‘lgan.

2-o‘rin

Alan Shirer 11 ta xet-trik bilan bu ro‘yxatda 2-o‘rinni egalladi. Angliyalik mashhur to‘purar "Nyukasl", "Blekbern" va "Sautgempton" muhlislarini o‘z gollari bilan xursand qilgan.

1-o‘rin

Reytingimizning peshqadami - Serxio Aguero. Argentinalik to‘purar hujumchi o‘tgan 2021 yilda yuragidagi muammolar sabab faoliyatini yakunlagandi. U "Atletiko"dan "Manchester Siti" safiga o‘tganidan so‘ng APLda 12 bor xet-trik qayd etgan, ligadagi umumiy gollari soni esa 184 tani tashkil qiladi. Ko‘ramiz, yaqin orada unga yaqinlasha oladigan futbolchi chiqa olarmikin.