Дидье Дешам шогирдлари ўз дарвозасидан бирорта ҳам тўп ўтказиб юбормасдан яна бир бор ғалаба қозонишди.
"Уч ранглилар" Евро-2024 саралашида Ирландия Республикасини мағлуб этишди (2:0). 19 ва 48-дақиқаларда Орельен Тчуамени ва Маркус Тюрам рақиблар дарвозасига гол уришди.
Французлар кетма-кет бешинчи ўйинда ғалаба қозонишди - бу терма жамоа учун шахсий рекорд, - дея қайд этади Opta. Қолаверса, жамоа 16 йил ичида биринчи марта кетма-кет бешта ўйинда дарвозаси дахлсизлигини сақлаб қолди.
Франция терма жамоаси 15 очко билан саралаш гуруҳида ишончли тарзда пешқадамлик қилмоқда. Навбатдаги турда амалдаги жаҳон вице-чемпионлари Нидерландияга қарши сафарда ўйнайди – ўйин 13 октябрь куни бўлиб ўтади.
