Айни дамда Франция терма жамоаси юлдузи Килиан Мбаппе жаҳон матбуотининг диққат марказида бўлиб турибди. Мухлисларни у фаолиятини қаерда давом эттириши қизиқтирмоқда. Қуйида шу ҳақда қисқача сўз юритамиз.
Мбаппенинг раддияси
Килиан «ПСЖ» билан 2024/2025 йилги мавсум учун шартномасини автоматик равишда узайтиришни рад этди. Бу факт эътибордан четда қолмади. Бундан ташқари, француз клуби президенти Носир Ал-Хелайфийнинг сўзлари оловга мой қўшгандек бўлди ва у шартномани узайтириш ҳақидаги маълумотга изоҳ беришдан бош тортди. Айни пайтда юлдузнинг француз клуби билан шартномаси 2024 йилнинг июнида, навбатдаги Европа чемпионати арафасида тугайди.
Кузда кескин вазият юзага келди
Лионель Мессининг Париж клубига келиши Килианга ижобий ҳис-туйғуларни қўшмади. Ноябрь-декабрь ойларида Қатарда бўлиб ўтган жаҳон чемпионатидан сўнг аргентиналик футболчининг нафақат майдонда, балки кийиниш хонасида ҳам етакчига айлангани дунёдаги энг қиммат футболчига ёқмасди. Франциялик футболчи клуб раҳбариятига нисбатан нохуш гапларни айтишдан тийилмади. Ўз навбатида, унинг шериклари юлдузни қўллаб-қувватламади. Хусусан, Неймар Мбаппенинг худбин хатти-ҳаракатидан ғазабланди. Ўша пайтда «ПСЖ» раҳбарияти маълум даражада кескинликдан қочиш учун Мбаппени «Реал»дан ташқари исталган жойга қўйиб юборишга тайёр эди. У мунтазам равишда турли ОАВ янгиликларида пайдо бўлди.
«Реал»дан ташқари «Ливерпуль» варианти ҳам тилга олинди. Франция терма жамоаси ҳужумчисининг трансфери учун 300 миллион еврога яқин маблағ ажратиш ва муносиб маош билан беш йиллик шартнома таклиф қилиш режалаштирилган эди. АПЛнинг бошқа гигантлари, масалан, «Манчестер Сити» Мбаппега нисбатан вазминлик билан ҳаракат қилишга интилди. Бу тўғрисида жуда ҳам кам хабар чиқди.
Саудларчи?
«Ал-Ҳилол» клуби Мбаппе учун «ПСЖ»га таклиф билан чиқди. Саудия Арабистони клуби футболчи учун 300 миллион евро тўлашга тайёр эди. Ўтган ёзда эса футболчининг ўзига йилига 700 миллион евро таклиф қилганди! Аммо Мбаппе саудияликларга қизиқиш билдирмаяпти. Демак ҳар қандай миқдордаги пул билан унинг истагини ўзгартиришнинг иложи йўқ. Вазият шу ҳолга етиб келдики, Мбаппе ва «ПСЖ» барчага рад жавобини беравериб, футболчини ёвуз персонажга айлантириб қўйди.
Айни дамда Килианнинг «ПСЖ»да ишлари яхши кетмоқда. Бироқ мавсум бошланишидан олдин унинг келажаги ҳақида кўплаб саволлар пайдо бўлганди. Ҳатто шундай вариант ҳам бор эдики, «ПСЖ» раҳбарияти ўз етакчисига бир дақиқа ҳам ўйнашга рухсат бермайди. Бироқ миллий чемпионатнинг «Лион»га қарши биринчи кузги ўйинидаги дубл уларга ишонч уйғотди.
Килиан Мбаппе эндигина 24 ёшда, лекин у аллақачон кўплаб совринларни қўлга киритган, унинг асосий ютуғи жаҳон чемпиони унвони ҳисобланади. Бироқ клублар миқёсида Мбаппе фақат Франция чемпионлигини қўлга киритди. Албатта, унинг даражаси учун бу анча кичик. Демак, Килиан Саудия Арабистони вариантига алданиб қолиши даргумон. Шунинг учун биз уни Европа футболи гигантларидан бирида кутамиз.
