U-23 Осиё кубоги саралаш босқичи доирасида Ўзбекистон ОТЖ 9 сентябрь, шанба куни Гонгконгга қарши баҳс олиб борди.

 Учрашувнинг 6-дақиқасидаёқ ҳисоб очилди. Ҳусайн Норчаев рақиб дарвозасини ишғол қилди. 25-дақиқада Аббосбек Файзуллаев ўзбекистонликларнинг иккинчи голига муаллифлик қилди. Орадан 3 дақиқа ўтиб, Алишер Одилов пенальтидан унумли фойдаланиб, ҳисобни йирик кўринишга олиб келди.

Иккинчи бўлим ҳам Тимур Кападзе шогирдлари устунлигида ўтди. 57-дақиқада Умарали Раҳмоналиев Файзуллаев ишлаган пенальтини аниқ амалга оширган бўлса, икки дақиқа ўтиб, Норчаев дублни расмийлаштирди. 68-дақиқада Ҳусайн яна бир бор ўз ҳисобига гол ёздириб қўйди. 74-дақиқада Ман Йип Чеук ўз дарвозасига гол уриб қўйди ва ҳисобни 7:0 кўринишига келишига сабабчи бўлди. Сўнгги дақиқаларда эса Улуғбек Ҳошимов ҳет-трик қайд этиб, учрашувдаги якуний ҳисобни ўрнатди.

Шу тариқа, Ўзбекистон U-23 терма жамоаси рақибини 10:0 ҳисобида тор-мор этди.

Эслатиб ўтамиз, саралаш босқичининг 1-турида Ўзбекистон Афғонистон устидан 8:1 ҳисобида ғалаба қозонган эди.

Осиё кубоги саралаши, 2-тур
9 сентябрь, шанба
Гонгконг U-23 – Ўзбекистон U-23 0:10
Голлар: 0:1 — 6 Ҳусайн Норчаев, 0:2 — 25 Аббосбек Файзуллаев, 0:3 — Алишер Одилов (пенальти), 0:4 — 57 Умарали Раҳмоналиев (пенальти), 0:5 — 59 Ҳусайн Норчаев, 0:6 — 69 Ҳусайн Норчаев, 0:7 — 74 Ман Йип Чеук (автогол), 0:8 — 83 Улуғбек Ҳошимов, 0:9 — 88 Улуғбек Ҳошимов, 0:10 — 90+3 Улуғбек Ҳошимов.