U-23 Osiyo kubogi saralash bosqichi doirasida O‘zbekiston OTJ 9 sentyabr, shanba kuni Gongkongga qarshi bahs olib bordi.

 Uchrashuvning 6-daqiqasidayoq hisob ochildi. Husayn Norchayev raqib darvozasini ishg‘ol qildi. 25-daqiqada Abbosbek Fayzullayev o‘zbekistonliklarning ikkinchi goliga mualliflik qildi. Oradan 3 daqiqa o‘tib, Alisher Odilov penaltidan unumli foydalanib, hisobni yirik ko‘rinishga olib keldi.

Ikkinchi bo‘lim ham Timur Kapadze shogirdlari ustunligida o‘tdi. 57-daqiqada Umarali Rahmonaliyev Fayzullayev ishlagan penaltini aniq amalga oshirgan bo‘lsa, ikki daqiqa o‘tib, Norchayev dublni rasmiylashtirdi. 68-daqiqada Husayn yana bir bor o‘z hisobiga gol yozdirib qo‘ydi. 74-daqiqada Man Yip Cheuk o‘z darvozasiga gol urib qo‘ydi va hisobni 7:0 ko‘rinishiga kelishiga sababchi bo‘ldi. So‘nggi daqiqalarda esa Ulug‘bek Hoshimov het-trik qayd etib, uchrashuvdagi yakuniy hisobni o‘rnatdi.

Shu tariqa, O‘zbekiston U-23 terma jamoasi raqibini 10:0 hisobida tor-mor etdi.

Eslatib o‘tamiz, saralash bosqichining 1-turida O‘zbekiston Afg‘oniston ustidan 8:1 hisobida g‘alaba qozongan edi.

Osiyo kubogi saralashi, 2-tur
9 sentyabr, shanba
Gongkong U-23 – O‘zbekiston U-23 0:10
Gollar: 0:1 — 6 Husayn Norchayev, 0:2 — 25 Abbosbek Fayzullayev, 0:3 — Alisher Odilov (penalti), 0:4 — 57 Umarali Rahmonaliyev (penalti), 0:5 — 59 Husayn Norchayev, 0:6 — 69 Husayn Norchayev, 0:7 — 74 Man Yip Cheuk (avtogol), 0:8 — 83 Ulug‘bek Hoshimov, 0:9 — 88 Ulug‘bek Hoshimov, 0:10 — 90+3 Ulug‘bek Hoshimov.