2006 йилги жаҳон чемпиони Фабио Гроссо “Лион”ни бошқаради.
Италия терма жамоасининг собиқ ҳимоячиси француз клуби билан келишувга эришди, деб хабар беради L'Equipe. “Лион” аввалроқ Грэм Поттер ва Оливер Гласнер билан музокаралар олиб борган, аммо улар муваффақиятсизликка учраган. Французлар Женнаро Гаттузо номзодини ҳам рад этишди.
Гроссо шу ҳафта бошида ишдан бўшатилган жамоа бош мураббийи Лоран Бланнинг ўрнини эгаллайди. Италиялик собиқ футболчи икки йиллик шартнома имзолайди. Унинг тақдимоти келаси душанба куни бўлиб ўтади.
Гроссо 2007 йилдан 2009 йилгача "Лион"да ўйнаган. Унинг мураббийлик фаолиятидаги сўнгги клуби "Фрозиноне" бўлиб, у ерда 2021 йилдан 2023 йилгача ишлаган. Мураббий бошчилигида жамоа А Серияга чиқди.
Лига 1нинг 4-туридан сўнг “Лион” 1 очко жамғариб, турнир жадвалида 20-ўринда бормоқда.
