Ўзбекистон миллий терма жамоаси 1 февраль куни Озарбойжон миллий терма жамоасига қарши ўртоқлик учрашувида майдонга тушади. Учрашув Ўзбекистон миллий терма жамоасининг БААдаги ўқув-машғулот йиғинлари доирасида ташкил этилади.

Ўзбекистон миллий терма жамоаси 20 январь – 1 февраль кунлари БААда ўқув-машғулот йиғинларини ўтказади. Аввалроқ, йиғининнг сўнгги куни Ўзбекистон миллий терма жамоаси Европа терма жамоаларидан бирига қарши ўртоқлик учрашувида майдонга тушиши мумкинлиги ҳақида хабар берилганди. Олиб борилган музокаралар якунига кўра, рақиб сифатида Озарбойжон миллий терма жамоаси танланди.

БААдаги йиғин якунланганидан сўнг Ўзбекистон миллий терма жамоаси 2-5 февраль кунлари тайёргарликни Тошкентда давом эттиради. Миржалол Қосимов шогирдлари мавсумдаги илк расмий учрашувни 6 февраль куни Тошкентдаги «Пахтакор» стадионида ўтказишади.

Маълумот ўрнида, Ўзбекистон миллий терма жамоаси шу кунгача Озарбойжонга қарши 8 марта майдонга тушиб, 2 марта ғалаба қозонган, 2 марта дуранг ўйнаган ва 4 марта имкониятни бой берган; тўплар нисбати – 10:11, Озарбойжон фойдасига. Эътиборли томони, ҳар иккала терма жамоа ўртасидаги сўнгги ўйин 2009 йилнинг 1 февраль куни БААнинг Дубай шаҳрида ўтказилган бўлиб, ўшанда ҳам Қосимов қўл остида тўп сурган Ўзбекистон миллий терма жамоаси Озарбойжон билан 1:1 ҳисобида дуранг ўйнаган эди.