"ПСЖ" ҳужумчиси Рандал Коло-Муани дебют учрашувида жамоасига мағлубиятдан қутулиб қолишга ёрдам бермади.
Парижликлар Лига 1 5-туридан ўрин олган ўйинда ўз майдонида “Ницца”га имкониятни бой беришди (2:3). Яқинда Франкфуртнинг “Айнтрахт” клубидан 95 миллион еврога сотиб олинган 24 ёшли форвард 64-дақиқада захирадан майдонга тушди ва финал ҳуштаги чалинишидан бироз олдин у Килиан Мбаппега голли узатма берди.
"Биз яхши футбол кўрсатган ва бу мавсумда мағлуб бўлмаган жуда жиддий рақибга қарши ўйнадик", - деди "ПСЖ"нинг янги келган футболчиси. - Жамоамизда жуда кўп ўзгаришлар бўлганини унутманг, мослашиш учун вақт керак. Биз ишлашда давом этамиз", — дея Коло-Муанининг сўзларини келтиради журналист Адриен Греньер.
