"Барселона" бош мураббийи Хави Эрнандес Жоау Феликс ва Жоау Канселунинг ўйини ҳақида ўз фикрлари билан ўртоқлашди.
Ҳар икки португалиялик ҳам "Блауграна" сафида илк бор шанба куни "Бетис"га қарши ўйинда (5:0) асосий таркибда майдонга тушишди - иккаласи ҳам биттадан гол уришди.
"Гап индивидуал маҳоратига шубҳа йўқ бўлган икки футболчи ҳақида кетмоқда. Уларнинг савияси машғулот пайтида ҳам кўриниб турарди.
Канселу Гвардиола билан иши туфайли ўйинни жуда яхши тушунади. Феликс ҳам бу борада жуда яхши - у жамоага кўпроқ ранг-баранглик беради. Жоауларнинг иккаласи ҳам "Барселона"да ўйнашни орзу қилган ва биз бундан фойдаланишимиз керак", - деди Хави ўйиндан кейинги интервьюсида.
