2013 йилги Осиё Чемпионлар лигаси гуруҳ босқичига қуръа ташлаш маросими якунланиши биланоқ, “Бунёдкор” бош мураббийи Миржалол Қосимовнинг фикрлари билан қизиқдик.

- “Бунёдкор” жой олган “G” гуруҳида жудаям кучли жамоалар ўрин олган. Бизга маълумки, Япония “J” лигаси қитъамизнинг энг кучли чемпионатларидан бири хисобланади. Ана шу лиганинг янги чемпиони – “Санфреччо Хиросима” клуби қандай қудратга эга эканлигини ҳозирданоқ айтиш мумкин. Бу жамоани шу дақиқалардан бошлаб, клублар ўртасидаги жаҳон чемпионати баҳсларида кузатишни бошлайман. “Похан Стилерз” клуби билан кўп бор тўқнаш келганмиз ва бу клубни имкониятларини яхши биламиз. Жанубий Корея “К” лигаси ҳам худди Япониядаги каби кучли чемпионатга эга. Поханликлар чемпионат доирасида 3-ўрин билан чекланган бўлсалар-да, Корея кубоги баҳсларида ғолиб чиқишиб, ўз совринлари сонини бойитишди. Хитой вакиллари билан ҳали рўбарў келмаганмиз. Бироқ бу мамлакат футболи сўнгги йилларда жаҳонга машҳур юлдузларни жалб этиб, кескин кўтарилишга эришишмоқда. Марчело Липпи, Дидье Дрогба каби машҳурлар фикримни тасдиқлаб турибди.

Лекин “Бунёдкор” ҳам Осиёда ўз ўрнига, нуфузига эга бўлган клуб. Ўтган йили Шарқий минтақада илк бора иштирок этиб, ўйлайманки мухлисларни хушнуд эта олдик. Бу минтақадаги иккинчи уринишимиз мураббий ва футболчилардан қўшимча куч ва масъулият талаб этади. Умид қиламанки, Шарқий минтақадаги иккинчи уринишимиз ҳам мухлисларга ёқадиган даражада бўлади, - дейди Миржалол Қўшоқович.