Арманистон пойтахти Ереван шаҳрида бокс бўйича ёшлар ўртасида ўтказилаётган жаҳон чемпионатида айни дақиқаларга келиб бешта вазн тоифасида финалчилар номи маълум бўлди.
Эътиборлиси, дунёнинг 70 давлати вакиллари ўртасида ўтказилаётган мазкур мусобақада ҳамюртимиз Муроджон Аҳмадалиев ҳам жаҳон чемпионатининг олтин медаллари учун курашни давом эттирадиган бўлди.
Оғирлик вазни 49 кг.гача бўлган боксчилар мусобақасида Ватанимиз шарафини ҳимоя қилаётган Муроджон бугун бўлиб ўтган ярим финал жангида филиппинлик Жаде Борнеага қарши баҳс олиб бориб, 24:15 ҳисобида зафар қучди.
Энди Муроджон, 7 декабрь куни ўтказиладиган финал баҳсида хитойлик Бин ЛВ билан жаҳон чемпионатининг олтин медаллари учун куч синашади.
Бугун, шунингдек, яна бир ҳамюртимиз Акмалбек Қосимов (-69 кг) ҳам ярим финал жангини ўтказади. Финал баҳси йўлланмаси учун Акмалбек хитойлик Жиди Жангга қарши рингга кўтарилади.
Биз эса ўз навбатида Акмалбек Қосимовга ҳам ярим финал баҳсида омад ва зафарлар тилаб қоламиз.
Шавкат Жалилов
Маданият ва спорт ишлари вазирлиги матбуот хизмати
