Микель Артетанинг айрим паллаларда қиладиган золимлиги, "Арсенал"нинг фойдасига хизмат қилади. Айнан шу сабабли бир йил ичида бу жамоа ўртамиёна клуб даражасидан чемпионлик учун даъвогар жамоага айланди. Шундай экан, мухлислар Аарон Рамсдейл борасида эътироз билдиришдан тўхтатиши керак. Сўнгги икки ўйинга Давид Райянинг танлаб олиниши, кўплаб салбий фикрларга сабаб бўлганди. Баъзилар бу қарорни адолатсиз, ўйланмай қилинган ва ҳурматсизлик деб ҳам баҳолади. Аслида эса бундай эмас. Бу воқеа Аарон Рамсдейлга дунёнинг энг катта клубларидан бирида экани ва бу ерда ўз ўрни учун курашиши кераклигини кўрсатиб берди. Бу қарорни қабул қилиш Микель Артетага ҳам осон бўлмаган. Бу борада унунг ўзи шундай дейди:
"Мен ҳар бир захирадаги футболчи учун қайғураман ва азоб чекаман. Аммо бу ҳам бир мусобақа. Бу ерда ҳам кураш кечади. Жамоа учун фойдали қарорларни қабул қилиш эса менинг ишимдир. Асосий таркибни эълон қилишдан олдин, унга кирмаган футболчиларни кўриш менга ҳам осон эмас".
Тўғри, Артетанинг қарори ёқимсиз туюлади. Аммо дунёда ҳеч бир муваффақиятли мураббий йўқки, футболчиларнинг кўнглига қараб қарор қабул қилган бӯлсин. Шу каби, Артета ҳам бу борада ўз ҳукмини ўтказмоқда. Сўнгги йиллар у совуққон қарорлари билан жамоани яхшилай олди. Бу жараён Микель Артетанинг собиқ жамоадоши ва дўсти, Месут Ўзилни асосий таркибдан чиқариб ташлаш билан бошланганди. 2020 йилнинг охирларига бориб, Ўзил қайдномаларга ҳам киритилмай қўйди. У асосий жамоа билан машғулот ўтказиш ҳуқуқидан маҳрум этилганди. Немис футболчисининг шартномаси бекор қилиниши кенг футбол оммасида салбий фикр уйғотиб, Артетанинг мураббийлик қобилиятини сўроқ остига қўя бошлади. Шундай ҳолатда ҳам, у собит турди ва Ўзил ўрнига бошқа юлдузларни келтирди.
Месут Ўзил Артета "вахший"лигидан азият чеккан ягона футболчи эмасди. Жамоанинг собиқ ҳужумчилари Александер Ляказетт ва Пьер-Эмерик Обамеянглар ҳам ўз вақтида асосий таркибдан "чопилган". Бир пайтлар мухлислар ёқимтойи бўлган бу икки футболчи "Арсенал" билан яхши алфозда хайрлашмади: Ляказетт эркин агент сифатида кетди, Обамеянгнинг битими эса муддатидан олдин тугатилди. Негаки, ҳар икки юлдуз Артета қўйган стандартларга жавоб бера олмасди. "Арсенал"нинг 2019 йилдаги рекорд хариди бўлган Пепе ҳам яқиндагина эркин агент сифатида жамоадан тарк этди.
Ҳаттоки, ҳеч қандай хато қилмаган Киран Тирни Артетанинг чемпионлик йўлидаги ҳаракатлари сабабли қурбон қилинди. Микель Артета, аввало, Тирнини Тимбер ва Зинченко келишидан огоҳлантирган. Кейин эса "Реал Сосьедад"га ижарага юборган. Талантли, аммо беқарор бўлган Маттео Гендузи ва меҳнаткаш Лукас Торрейралар ҳам Артета талабларига жавоб бера олмагани учун, жамоадан кетганини эслаб ўтиш даркор.
Микель Артетанинг тозалаш ишлари қанчалик бешавфқат бўлмасин, у ўзининг фойдасини бермай қолмади. Кеткизилган футболчилар ўрнида мутлақо янги юлдузлар – Эдегор, Сака, Салиба ва бошқалар пайдо бўлди. Испаниялик мутахассис фақат майдондагина бу ишларни қилгани йўқ. У футболчиларнинг таомланиш пайтини ҳам кузатиб, у ердаги алоҳида ажралишларга йўл қўймай келмоқда. Хусусан, футболчилар тушлик вақтида ўзи истаган столда атрофида ўтира олмайди. Улар мураббийлар штаби ва академия тарбияланувчилари, ҳар сафар ҳар хил шериклар билан бирга овқатланади. Бу нарсаларнинг ҳаммаси бирдамликни мустаҳкамлашга қаратилган ишлардир. Ушбу ишлар ўтган мавсумдаги муваффақиятли натижалар калитига айланди. Шундай экан, мухлислар Рамсдейлга ноҳақлик қилинди деб билмасликлари лозим. Негаки, Райяга ҳам ўйин вақти керак. Агарда Рамсдейл жароҳат оладиган бўлса, муҳим ўйинларда Райяга тажриба керак бўлади.
Нима бўлган тақдирда ҳам натижалар учун мураббий жавобгар. Шундай экан, қандай ўйнаш ва кимлардан фойдаланишни ҳам унга қўйиб бериш лозим.
ИСМАТОВ Ж.
