Миллий чемпионатимиз якунига етгач, барча жамоаларимиз таътилга чиқишди. Турнир жадвалида дастлабки уч ўринни қўлга киритган пойтахт жамоалари келгуси йили халқаро майдонларда юртимиз шарафини ҳимоя қилишади. Афсуски, бундай имкониятга Қаршининг "Насаф" жамоаси эга бўла олмади. Сабаби барчага аён.
Келгуси мавсумда "Насаф" фақатгина ички чемпионатимиз ҳамда Ўзбекистон кубогида иштирок этади. Ўйлаймизки, жамоа мутасаддилари якунига етган мавсумдан керакли хулоса чиқаришган ва шундан келиб чиққан ҳолда келгуси мавсумда муносиб иштирок этишади. Гарчи мавсум жамоамиз учун омадли якунланмаган бўлса-да, ана шу ёмон мавсумнинг "энг яхшилари"ни аниқлашга ҳаракат қилдик. Ижтимоий тармоқларда ўтказган сўровномамизга кўра, "Насаф" ҳамда Миллий терма жамоамиз аъзоси Шоҳруҳ Гадоев мухлислар фикрича, 2012 йилнинг энг яхши футболчиси деб топилди.
Шоҳруҳ Гадоев 144 балл тўплашга эришган бўлса, унинг яқин таъқибчиси Фозил Мусаев эса 132 балл тўплади. Кучли учликни 88 балл билан туркманистонлик легионер Артур Геворкян якунлаб берди. Иван Бошкович, Мурод Зуҳуров, Шавкат Раимқулов каби футболчилар муҳлислар эътирофига эга бўлишмади. Демак сўровноманинг якуний кўриниши қуйидагича:
1. Шоҳруҳ Гадоев - 144
2. Фозил Мусаев - 132
3. Артур Геворкян - 88
4. Кенжа Тўраев - 49
5. Илҳом Юнусов - 40
6. Ботир Қораев - 36
7. Владимир Шишелов - 21
8. Мақсуд Каримов - 19
9. Жаҳонгир Жиямуродов - 15
10. Андрей Переплёткинс - 14
11. Эркин Бойдуллаев - 10
12. Алишер Юсупов - 10
13. Боян Малишич - 5
14. Фарруҳ Сайфиев - 3
15. Нодир Санақулов - 1
Олим Толипов
