Испан матбуоти "Барселона"нинг собиқ бош мураббийи Хосеп Гвардиола тўғрисидаги китобдан парчалар чоп этди.
Китоб AS газетаси мухбири Гильермо Балаге томонидан инглиз тилида ёзилган бўлиб, "Пеп, ғалабанинг ўзгача йўли" деб номланган. Китоб Англияда сотилмоқда.
Муаллиф китобнинг бир бобида мураббийнинг нима учун "Барселона"ни тарк этганлиги тўғрисидаги масалага тўхталади. Муаллифнинг ёзишича, Гвардиоланинг истеъфосига Жозе Моуриньо сабаб бўлган эмиш.
"Гвардиола билан суҳбатлашганингда Моуриньо номини тилга олсанг, унинг қиёфаси ўзгарганини сезасан. Моуриньо ҳақидаги гаплар унинг учун ёқимсиз эканлигини аниқ бўлади. Моуриньо унга руҳий таъсир ўтказаверганлиги оқибатида, Пеп касбидан завқ олмай қўйганлигини менга унинг ўзи айтган эди", - дейилади китобда.
