Дилшод Нуралиев қўл остидаги Ўзбекистон ўсмирлар терма жамоаси 2013 йилдаги илк ўқув-машғулот йиғинларини 25-31 январь кунлари Тошкентда ўтказади. Йиғин аввалида терма жамоага номзод футболчиларнинг барчаси чуқурлаштирилган тиббий кўрикдан ўтказилади, шунингдек, ўсмир футболчиларнинг жисмоний тайёргарлиги ҳам текширилади.

Ўзбекистон ўсмирлар терма жамоаси 2013 йилдаги илк йиғинида 3та назорат-ўртоқлик учрашувида майдонга тушиши режалаштирилмоқда.

Йилнинг дастлабки йиғинида асосий эътибор ўйиндаги техник-тактик ҳаракатларни мукаммаллаштиришга, ҳужум ва ҳимоядаги ўйин тизимларини моделлаштиришга қаратилади. Йиғин давомида Дилшод Нуралиев шогирдлари учта назорат учрашувида майдонга тушиши режалаштирилган. Рақиблар номи кейинроқ аниқлик киритилади.

Январь ойидаги йиғин Ўзбекистон ўсмирлар терма жамоаси учун айниқса муҳим бўлган 2013 йилдаги йиғинлар кетма-кетлигининг дастлабкиси бўлади. Ўсмирлар терма жамоасининг 2013 йил кузида БААда ташкил этиладиган Жаҳон чемпионати баҳсларига муносиб тайёргарлик кўришини таъминлаш мақсадида йиллик дастур ишлаб чиқилган бўлиб, унга кўра Дилшод Нуралиев шогирдлари Ўзбекистондан ташқари, Европа ва Осиё мамлакатларида ҳам қатор йиғинларни ўтказишлари, терма жамоалар миқёсида ўртоқлик учрашувлари ва халқаро мусобақаларда иштирок этишлари кўзда тутилган.

Ўзбекистон ўсмирлар терма жамоасининг 2013 йилги тайёргарлик режаси декабрь ойининг иккинчи ярмида ЎФФ Президенти Мираброр Усмонов томонидан тасдиқланади.

Эронда бўлиб ўтган 2012 йилги Осиё чемпионатида ғолибликни қўлга киритган Дилшод Нуралиев қўл остидаги Ўзбекистон ўсмирлар терма жамоаси 2013 йилги ўсмирлар ўртасидаги жаҳон чемпионати иштирокчиси ҳисобланади. Мусобақа 17 октябрь – 8 ноябрь кунлари Бирлашган Араб Амирликларининг Дубай, Рас ал-Хайма, Фужайра, Абу Даби, Ал-Айн ва Шаржа шаҳарларида бўлиб ўтади.