Ўзбекистон U-20 ёшлар терма жамоаси 2013 йил учун ўзининг тайёргарлик дастурини тақдим этди. Бу ҳақда ЎФФ расмий сайти хабар тарқатди.

2013 йилнинг 16 июнь - 13 июль кунлари Туркияда бўлиб ўтадиган U-20 ёшлар ўртасидаги жаҳон чемпионати финал босқичига йўлланмани қўлга киритган Ўзбекистон ёшлар терма жамоаси , режага кўра 2013 йилдаги илк ўқув-йиғин машғулотини Тошкент шаҳрида бошлайди.

8-15 январь кунлари Тошкентда бўлиб ўтадиган йиғин якунига етгач, Ўзбекистон ёшлар терма жамоаси ҳар йили анъанавий тарзда ўтказиладиган МДҲ кубогида қатнашиш учун Россиянинг Санкт-Петербург шаҳрига жўнаб кетади. 17-25 январь кунлари бўлиб ўтадиган мазкур турнир, Аҳмаджон Мусаев шогирдлари учун 2013 йилдаги илк халқаро мусобақа бўлади.

Тақдим этилган дастурга кўра, Ўзбекистон ёшлар терма жамоаси февраль ойида Туркияда, март ва апрель ойларида Европа қитъасида бир қатор ўқув-машғулот йиғинлари ва ўртоқлик учрашувларини ташкил қилишни режалаштирилган.

Ўзбекистон U-20 ёшлар терма жамоасининг 2013 йил учун тўлиқ тайёргарлик дастури келаси ҳафтада ЎФФ Президенти Мираброр Усмонов томонидан тасдиқланади.