«Барселона» Европа чемпионлар лигаси гуруҳ босқичи 2-тури доирасида «Порту» клуби меҳмони бўлиб, кичик ҳисобда ғалаба қозонди. Каталонияликлар ярим ҳимоячиси Ламин Ямал учрашувни асосий таркибда бошлади.

Баҳснинг 71-дақиқасида 16 ёшли футболчининг қорни оғриб қолгани учун ҳожатхонага боришига тўғри келди. Аммо у майдонга қайта олмади. Баҳснинг 80-дақиқасида унинг ўрнига Маркос Алонсо туширилди. «Барселона» деярли 10 дақиқа давомида ўн киши бўлиб ўйнашига тўғри келди.

«Барса» бош мураббийи Хави вазиятга қуйидагича изоҳ берди:

«Ламин Ямал ўзини ёмон ҳис қилди. Унинг қорни оғриб қолди. У менга ўйин пайтида буни айтди. Юзага келган танаффусдан фойдаланиб мен унга ҳожатхонага бориб келиш кераклигини айтдим. Аммо якунда у майдонга қайта олмаслигини менга айтишди».