Мамлакатимизда кўзга кўринган футболчилардан бири бўлган Анвар Ражабов мустаҳкам оила йилининг сўнгги ойида, аниқроғи, 7 декабрь куни уйланди. Ушбу мавсумда Ражабов хорижда илк бор фаолият олиб борди. Ёзда “Бунёдкор”ни тарк этган ҳужумчи Таиланднинг “Бурирам Юнайтед” клуби билан шартнома имзолаганди. Сўнгги пайтларда бу футболчининг Таиланддаги фаолияти ҳақида маълумотлар пайдо бўлди. Шуни айтиш керакки, “Бурирам Юнайтед” Таиланд Ассосияция кубоги соҳиби бўлиб келаси йили ҳам Осиё Чемпионлар лигасида иштирок этиш ҳуқуқини қўлга киритди. Ражабовнинг Таиланддаги фаолияти қандай ўтганлигини билиш мақсадида у билан қисқача суҳбатлашдик.

— Анвар, аввало мустаҳкам оила йилида янги оила қурганингиз билан табриклаймиз.
— Раҳмат.

— Ёзда “Бурирам” клуби билан шартнома имзолагандингиз. Айтингчи, Таиланддаги фаолиятингиз қандай ўтди?
— Аввало шуни айтишим керакки, Таиландга улкан мақсадларда боргандим. Аммо бу мамлакат иқлимига мослаша олмадим. Қолаверса, белимдаги жароҳат панд бергани боис жамоа билан келишган ҳолда ўртадаги шартномани бекор қилдик.

— Айни пайтда жисмоний ҳолатингиз қандай?
— Ёмон эмас. Ҳозир жисмоний жихатдан 60-70 фоизга тайёрман. Таиланддан қайтганимдан кейин бекор юрмадим ва индивидуал тарзда шуғулландим.

— Эркин ўйинчига айланганинингиз учун бошқа клублардан таклифлар бўлаётгандир?
— Ҳозирча ҳеч қандай аниқ таклиф тушгани йўқ. Лекин тез орада таклифлар бўлиши мумкин. Қолаверса, агентим ҳам бу борада иш олиб бормоқда.

— Фақат очиғини айтинг, Таиландга борганингиздан афсусда эмасмисиз?
— Бир тарафдан бундан афсусланганим йўқ. Чунки фаолиятимда биринчи бор хориж клубида тўп сурдим. Аммо иккинчи томондан у ернинг иқлимига мослаша олмай жароҳатга дуч келганимдан бироз ранжидим. Боиси бундай бўлишини кутмагандим ва мақсадим юқори эди. Лекин бу футбол.

Бобурбек Турсунов