Бугундан эътиборан "Пахтакор" ўзининг жонажон стадионида янги мавсумга тайёргарликни бошлаб юборди. 30 дақиқа давомида Андрей Шипилов футболчиларга чигал ёзди машғулотларини ўтказди. Шундан сўнг жамоа икки маротаба 10 дақиқадан стадионда кросс чопдилар.

Машғулотларда жами 33 нафар футболчи иштирок этди. Уларнинг орасида биронта янги ўйинчи йўқ. Ижарадан қайтган футболчилар —— Ғулом Ўрунов, Тимур Кагиров ва Санъат Шихов ҳам мавсум тайёргарлигини "шерлар" билан бошладилар. Легионерлардан фақатгина Боян Миладиновични учратишимиз мумкин эди. Кахи шу кунларда жамоа ихтиёрига келиб қўшилади.

"Яна севимли клубим сафида машғулот бошлаганимдан хурсандман. Анча вақтдан бери катта футболдан узилиб қолдим. Бу кунларни қандай ўтказганлигимни бир сўз билан ифодалаб бера олмайман. Энди олдимда жиддий вазифа турибди, аввало, мен яна бир бор асосий таркибга муносиб эканлигимни исботлашим лозим. Ундан ташқари, чемпионлик унвонини ўзимизда сақлаб қолиш ҳамда ОЧЛда муносиб иштирок этишимиз керак. Ўйлайманки биз бунга қодирмиз", - дейди Миладинович.
 
"Пахтакор" 6 январга қадар Тошкентда машғулот ўтказади ва бир кунлик танаффусдан сўнг 8 январь куни Тошкент - Шаржа йўналиши бўйлаб биринчи хориж йиғинини ўтказиш учун БААга учиб кетади. У ерда Мурод Исмоилов шогирдлари "Кубань" (Россия), "Металлист" (Украина), "Ал-Жаиш" (Қатар) жамоаларига қарши ўртоқлик учрашувларида майдонга тушадилар.