Ўзбекистон-Вьетнам ўйинининг назорат учрашуви мақомида ўтиши ва натижада, терма жамоамиз ФИФА рейтингидаги баллардан қуруқ қолиши - кўплаб саволларни юзага келтирмоқда.
Кўпчилик ФИФА рейтингидаги ўрнимиз қизиқ эмас, чунки 2-босқичга қуръа ташлаб бўлинди деб ўйламоқда. Аслида, рейтингдаги ўрнимиз ЖЧ-2026 саралашининг охиригача ўз аҳамиятини йўқотмайди. Чунки 3-босқичда ҳам Япония, ҳам Жанубия Корея каби терма жамоалар билан бир гуруҳга тушмаслик учун - рейтингдаги ўрнимизни яхшилашимиз шарт. Акс ҳолда, ОФКга 8,5 та ўрин ажратилиши ҳам бизга ёрдам бермаслиги мумкин.
Вьетнамга қарши ўйинни назорат учрашуви мақомида ўтказилишига ким айбдор?
Хитой, Вьетнам ва Ўзбекистон терма жамоалари октябрда ўртоқлик ўйинлари ўтказиш бўйича анча олдин келишувга эришишган. Жанубий Корея эса 2-босқич қуръасидан кейин, Таиланд ва Сингапур билан бир гуруҳдан жой олишидан хабар топгач, ўртоқлик ўйини таклифи билан Жануби-Шарқий Осиёнинг бошқа бир терма жамоаси - Вьетнамга мурожаат этади.
Октябрь учун аллақачон 2 та ўйинга розилик билдирган Вьетнам Корея таклифини ҳам қабул қилади. Хитой ва Кореянинг мезбон давлатлар эканлиги ва терма жамоа харажатларини қисман қоплашларини инобатга олган Вьетнам, ФИФАдан юқоридаги 2 та терма жамоага қарши ўйинларни рўйхатдан ўтказишни сўрайди. Ўзбекистонга эса бу ҳақида ўйиндан 4-5 кун олдин хабар беради.
Бу вазиятда терма жамоамиз олдида 2 та йўл қолган эди:
1. Вьетнамга жаҳл қилиб, ўйинни бекор қилиш ва октябрда фақат Хитойга қарши ўйинда майдонга тушиш. Чунки, ўйинга бир неча кун қолганида, ўртоқлик ўйини учун бошқа рақиб топишнинг ҳеч қандай иложи йўқ. Одатда, терма жамоалар ФИФА кунларидан камида 1 ой олдин барча музокараларни тугатишади.
2. ФИФА рейтингига бир марта кўз юмган ҳолда, саралаш ўйинлари олдидан барча футболчиларни назорат учрашувида синовдан ўтказиш.
Вьетнам ҳуқуқий жиҳатдан ҳеч қандай қоидани бузмагандир, лекин бу иши билан нафақат Ўзбекистон олдида, балки бу воқеадан хабар топган Осиёнинг бошқа терма жамоалари олдида ҳам ўз имиджига жиддий путур етказди.
