Исроилнинг "Маккаби" (Хайфа) ва "Маккаби" (Тель-Авив) клублари Европа футбол ассоциациялари иттифоқидан (УЕФА) келаси ҳафтага белгиланган еврокубок ўйинларини бошқа вақтга кўчиришни сўрашди. Бу ҳақда жамоалар матбуот хизматлари маълум қилди.

Хайфанинг "Маккаби" клуби Европа лигаси гуруҳ босқичининг 3-тури доирасида 26 октябрь куни меҳмонда Испаниянинг “Вильярреал” жамоасига қарши ўйнайди. Шу куни Тель-Авивнинг "Маккаби" клуби Конференциялар лигаси гуруҳ босқичи 3-турида Украинанинг "Зарья" клубини қабул қилиши режалаштирилган.

Аввалроқ УЕФА 12 ва 15 октябрь кунлари бўлиб ўтиши керак бўлган 2024 йилги Европа чемпионати саралаши доирасида Исроил терма жамоасининг Швейцария ва Косово жамоаларига қарши ўйинларини бошқа муддатга қолдирган эди.

Шунингдек, ташкилот мамлакатда режалаштирилган бошқа ўйинларни, жумладан, 21 ёшгача бўлган футболчилар ўртасидаги 2025-йилги Европа чемпионати саралаш ўйинлари ва 17 ёшгача бўлган футболчилар ўртасидаги Европа чемпионати саралаш ўйинлари, исроилликлар, бельгияликлар, уэльсликлар ва гибралтарликлар иштирокидаги ўйинларни бекор қилишга қарор қилди.