Isroilning "Makkabi" (Xayfa) va "Makkabi" (Tel-Aviv) klublari Yevropa futbol assosiasiyalari ittifoqidan (UYEFA) kelasi haftaga belgilangan yevrokubok o‘yinlarini boshqa vaqtga ko‘chirishni so‘rashdi. Bu haqda jamoalar matbuot xizmatlari ma’lum qildi.
Xayfaning "Makkabi" klubi Yevropa ligasi guruh bosqichining 3-turi doirasida 26 oktyabr kuni mehmonda Ispaniyaning “Vilyarreal” jamoasiga qarshi o‘ynaydi. Shu kuni Tel-Avivning "Makkabi" klubi Konferensiyalar ligasi guruh bosqichi 3-turida Ukrainaning "Zarya" klubini qabul qilishi rejalashtirilgan.
Avvalroq UYEFA 12 va 15 oktyabr kunlari bo‘lib o‘tishi kerak bo‘lgan 2024 yilgi Yevropa chempionati saralashi doirasida Isroil terma jamoasining Shveysariya va Kosovo jamoalariga qarshi o‘yinlarini boshqa muddatga qoldirgan edi.
Shuningdek, tashkilot mamlakatda rejalashtirilgan boshqa o‘yinlarni, jumladan, 21 yoshgacha bo‘lgan futbolchilar o‘rtasidagi 2025-yilgi Yevropa chempionati saralash o‘yinlari va 17 yoshgacha bo‘lgan futbolchilar o‘rtasidagi Yevropa chempionati saralash o‘yinlari, isroilliklar, belgiyaliklar, uelsliklar va gibraltarliklar ishtirokidagi o‘yinlarni bekor qilishga qaror qildi.
