Режага кўра кеча янги мавсумга тайёргарликни бошлаши кутилган «Навбаҳор» жамоаси машғулотларни кейинги ойда бошлайдиган бўлди. Бу ҳақда клуб мухлислар сайти хабар тарқатмоқда.

Манбада ёзилишича, 3 январда барча футболчилар тўпланиши кутилмоқда. Шундан сўнг кетадиганлар расман маълум бўлади. Маълумотларга қараганда, Собир Ҳамидов ва Абдумалик Абдуллаевлар «Нефтчи»га, Рустам Боқиев ва Акром Баҳриддиновлар «Қизилқум»га йўл олиши мумкин. Бундан ташқари яна кўплаб футболчилар янги мавсумни бошқа жамоаларда бошлашга яқин туришибди.

«Маблағ бўлмагандан сўнг кимни ҳам ўйнагиси келарди? Ботир Носиров айтгандек, футболчилар уйларига бир қоп раҳмат олиб боришмайдику! Хуллас, ҳозирги вазиятни яхши деб бўлмайди», деб ёзади Lochinlar.Uz интернет нашри.

«Навбаҳор»нинг янги мураббийи у ёқда турсин, йиғинлар қай тартибда ҳамда қаерда бўлиб ўтиши ҳам мавҳумлигича қолмоқда.

«Ҳар мавсум якунида шу аҳвол. Футболчилар «жуфтак»ни росталашади. Янги мавсумдан яна янги ўйинчилар... ва сўнгги ўринлар учун кураш! Етар энди, биз ҳам совринли ўринларда юрувчи «Навбаҳор»ни кўргимиз келади! Қачонгача яна кутамиз?», дея куюнчаклик билан хабарни тугатади, юқорида номи келтирилган манбада.