20 декабрдан бошлаб янги мавсумга тайёргарликни бошлаган қаршилик футболчилар айни пайтда кунига икки маҳалдан машғулотларни олиб боришмоқда.
Айни пайтда жамоамизнинг машғулотларида ўтган йили ўринбосарлар сафидан асосий таркибга жалб этилган Мирзамурод Жўрабоев, Санжар Баратов, Фаррух Сайфиев сингари ёш футболчилар иштирок этишмоқда. Шунингдек, кечадан бошлаб Раҳматулла Бердимуродов ва Мақсуд Ҳайитов ҳам асосий таркиб машғулотларига қўшилди. Таъкидлаш жоизки бу икки футболчи ҳуқуқий жиҳатдан “Насаф”га тегишли бўлсада, ўтган мавсумларни турли жамоаларда ўтказишди. Хусуан, Мақсуд Ҳайитов “Андижон” сафида олий лигада 20 та учрашувда майдонга тушиб, бир марта рақиб дарвозасига гол уришга ҳам эришди. Бердимуродов эса “Шўртан” ва “Динамо” сафида саккизта учрашувда майдонга тушди.
“Насаф”нинг Қаршидаги ўқув-йиғин машғулотлари 28 декабрьга қадар давом этади. Йиғиннинг сўнгги куни футболчилар иккига бўлинган ҳолда назорат учрашувида иштирок этишади.
