Бирлашган Араб Амирликларининг Ал-Айн шаҳрида шахмат бўйича шаҳарлар жамоалари ўртасида жаҳон чемпионати бошланди.

Халқаро шахмат федерацияси – ФИДЕ шафелигида ўтказилаётган мусобақада мезбонлар билан бирга Ўзбекистон, АҚШ, Англия, Австралия, Франция, Швеция, Греция, Туркия, Россия, Украина, Озарбойжон, Хитой, Ҳиндистон ва Қозоғистон каби 24 мамлакатнинг шаҳар жамоалари олти гуруҳга бўлинган ҳолда куч синашмоқда. Гуруҳ босқичида биринчи ва иккинчи ўринни эгаллаган жамоалар плей-офф баҳсига йўлланма олади.

Жаҳон чемпионатида Ватанимиз шарафини гроссмейстерларимиз – Марат Жумаев, Алексей Барсов, Сайдали Йўлдошев ва халқаро тоифадаги спорт устаси Андрей Квондан иборат Тошкент шаҳри жамоаси ҳимоя қилмоқда. Жамоамиз “В” гуруҳида Саратов (Россия), Птуж (Словения) ва Ченнаи (Ҳиндистон) жамоалари билан куч синашмоқда.

Мусобақанинг дастлабки партиясида вакилларимиз Ченнаи жамоасини 3,5:1,5 ҳисобида мағлубиятга учратди. Ушбу партияда М.Жумаев Н.Шиамни, А.Квон В.Ражешни, А.Барсов Н.Навалгундни мот қилган бўлса, С.Йўлдошев М.Карсикеян билан дуранг ўйнади. Жамоамиз иккинчи партияда Птужга имкониятни бой берди.

Гуруҳда иккинчи ўринда бораётган Тошкент шаҳри жамоаси учинчи турда Саратов жамоасига қарши дона суради.